60 balay naugdaw
CEBU, Philippines — Moabot 60 kapin o kulang ka mga panimalay ang naugdaw atol sa sunog nga niulbo sa may Sitio Purok 3 Lower Kamputhaw ning Dakbayan sa Sugbo kagahapon sa hapon.
Nadawat sa kabomberohan ang alarma alas 3:50 nga nakontrolar alas 5:12 na sa hapon.
Matud pa ni Chief Inspector Noel Nelson Ababon, City Fire Marshall sa Dakbayan sa Sugbo usa ka Alicia Tagundi ang nanawag kanila bahin sa sunog.
Sumala pa ni Ababon, ang sunog nagsugod sa panimalay ni Emma Limbaga Kwan, nga gipuy-an ni Roxanne Limbaga sa ikaduha nga andana nga pulos ginama sa light materials.
Dugang pa ni Ababon, dul-an sa P900 mil ang pagbanabana sa danyos sa maong sunog apan padayon pa ang imbestigasyon kon unsay hinungdan niini.
Ang kabomberohan miingon nga hagip-ot kaayo ang agianan padung sa sulod ug kusog usab ang hangin mao nga naglisod sila pagpawong sa kalayo.
Si Kagawad Ramil Salonoy sa Barangay Kamputhaw nitug-an nga ang mga nasunogan adto ipahimutang sa Purok 8 Gymnasium. Dugang pa ni Salonoy, tanan mga driver nila ug mga sakyanan maoy gigamit aron pagdala sa mga nasunogan sa maong gym.
Gitug-anan ni Salonoy, dili mominos sa usa ka gatos ka mga panimalay ang apektado tungod sa kalapad sa sunog ug kasagaran ginama sa light materials ang kabalayan.
Usa ka residente sa maong lugar ang nitumbok mao na lang iyang nakit-an ang pag-ulbo sa kayo ug dili na madala hinungdan igo na lang siya sa pagsyagit.
Ang mga residente nag-iyahay og hakot sa ilang mga butang, dunay uban nga dili makalakaw ang gitabangan pagbitbit sa mga kabanay ug silingan.
Samtang usa ka 10 anyos nga bata Joshua Melendrez, ang nangita sa iyang inahan kay pag-abot niya sa eskuylahan nasunog na ilang balay ug naguol kini kay dili makalakaw ang iyang inahan.( /IBM)(BANATNEWS)
- Latest
