Garma nihimakak polis luyo sa ‘vigilante killings’

CEBU, Philippines – Gihagit sa direktor sa Cebu City Police Office, Senior Supt. Royina Garma, si Mayor Tomas Osmeña nga pamatud-an ang pasangil nga adunay proteksyon gikan sa kapolisan ang nagpaluyo sa sunod-sunod nga patay sa dakbayan.

“Kung yan opinion mo, that’s your right.  Pwede mong isipin, but to express it, there should have a proof because it’s not good for the image of the police and he’s our local chief executive. I believe na the local chief executive natin is the one who should support us,” matud ni Garma.

Unang namahayag si Osmeña nga daku ang iyang pagduda nga gipaluyohan sa kapolisan ang mga suspek sa mga pagpatay sa dakbayan diin hangtud karon wala pay nasulbad.

Matud ni Garma nga ang gibuhat ni Osmeña daku og epekto sa seguridad sa Dakbayan sa Sugbo sanglit mawagtangan na og pagsalig ang katawhan sa polis ug moresulta kini nga dili na mahadlok ang ubang kriminal mobuhat sa krimen sanglit dili na sab sila mahadlok sa polis.

“You have to show evidence because it’s for the safety in general,” matud ni Garma.

Taliwala sa sunod-sunod nga patay sa siyudad, si Osmeña nihatag og higayun kang Garma sa pagsulbad niini.

Matud ni Osmeña nga sa panahon ni Senior Supt. Joel Doria isip direktor sa CCPO giingong wala’y problema ug hapsay ra ang siyudad.

Gani gipasigarbo ni Osmeña ang CCPO nga numero uno sa anti-drug operation sa tibuok nasud gumikan sa sunod-sunod nga operasyon nga gihimo ni Doria.

Gihulagway sa mayor nga dunay problema sa pag-ilis og liderato sa Police Regional Office (PRO)-7 nga gipangulohan karon ni Chief Supt. Debold Sinas.

Giangkon sa mayor nga nahadlok siya nga ang iyang mga tawo ang target ug gitumbok nga nalambigit sa illegal drug trade diin ang iyang gipasabot mao sila si Cadungog ug ang napatay nga si SPO1 Adonis Dumpit.

Dili gyud makatuo si Osmeña sa alegasyon sa kapolisan nga iya giingon nga nawagtangan na og kredibilidad.

“I’m scared so what but I won’t run away. I’ll hold my ground I’m responsible for the City. If people can protect me better all I’m asking for people just give me your tips but I will not abandon ship,” dugang ni Osmeña. (Decemay P. Padilla/GMR)(BANAT NEWS)