Niapil og kulata sa drayber sa polis gipangita

CEBU, Philippines – Gisubay karon sa mga imbestigador sa Cebu City Police Office kon kinsa kadtong miapil pagkulata kang Michael Banua nga maoy hinungdan nganong wala madala sa tambalanan ang namatay’ng kauban niining polis nga si PO3 Eugene Alain Calumba.

Nadiskubrehan sa awtopsiya nga dili fatal wound ang nahiaguman ni Calumba ug kon nadala dayon sa tambalanan dako pa kaayo ang iyang tsansang mabuhi, apan tungod kay walay midala sa tambalanan nahutdan kini sa dugo.

Giingong usa ra ka samad pinusilan sa iyang ilok ang nahiaguman ni Calumba.

“The medico legal review sabi niya, sir if this nadala lang sa hospital, baka, baka pa lang, nga mabuhi siya,” ang direktor sa Police Regional Office-7 nga si Chief Supt. Debold Sinas nagkanayon.

Matud pa ni Sinas kadaghanan sa mga mikulata mga barangay tanod human nga gipasanginlan ang duha nga misuway sa pagbanhig kang Kagawad Jessielou Cadungog. Sumala pang Sinas nga gipang- download nila ang mga video gikan sa media ug ipatudlo kang Banua kon kinsa ang mga midumog niya ug wala magpakabana nga dalhon sa tambalanan si Calumba.

“Kami gani nga mga polis pag ma-encounter namo dalhon namo sa hospital nang  mga biktima whether it’s the criminal or the victim. Basi’g naa pay pag-asa nga mabuhi.  Gi-mob ang driver (si Banua) gisipa-sipa pa, based sa testimony sa usa ka testigo,” si Sinas nagkanayon. Subayon nila ug pasakaan og kaso aron madakpan pinasikad sa warrant of arrest ang mga nalambigit.

“We’ll be filing for those nga tanan involved sa pagka-physical injury sa among witness. Tanang makuha namo sa video nga gi-post sa ABS-CBN ug sa Freeman, dalhon namo to.  Tapos kung kinsa tong ma-identify, file-an namo tanan,” dugang pa sa maong heneral.

Lumad nga taga Dumaguete si Calumba ug kagahapon gidala na iyang patay’ng lawas didto aron didto kini ilubong.

Ang drayber/bodyguard ni Cadungog nga si William Macaslang miangkon siya maoy nakapusil kang Calumba kay nagtuo siyang ambuson sila niini. Sila si Calumba ug Banua naagi sa lugar gikan nag-surveillance tungod sa ilegal nga drugas matud pang Sinas. Apan sa ilang pagpauli gipamusil sila ni Macaslang nga padung magtubil sa sakyanan ni Cadungog. (/IBM)(BANAT NEWS)