265 ka adik sa Bogo nigradwar sa rehabilitation program

CEBU, Philippines – Mga 265 ka drug dependents sa Dakbayan sa Bogo ang nigradwar sa Rehabilitation and Reintegration Program niadtong buwan sa Hulyo niining tuiga.

Atol sa graduation ceremony nga gipahigayon sa siyudad ang maong mga nigradwar gihatagan og certificates timailhan nga limpiyo na sila gikan sa ginadiling drugas ug nihuman sila sa ilang rehabilitasyon.

Gawas niini, nakadawat usab sila og scholarship grant diin ipaubos sila sa libre nga skills training sa Bogo Livelihood and Technical Skills Training Center.

Ang maong mga nigradwar nipaubos kini sa mga session sa Barangayan Barkadahay ubos sa Rehabilitation and Reintegration Program (ReRe) sa siyudad nga usa ka community-based drug rehabilitation treatment program.

Si Bise Mayor Mayel Martinez sa Dakbayan sa Bogo nagkanayon nga bisan og gideklara na ang ilang siyudad nga drug cleared magpadayon gihapon ang mao nilang programa.

Samtang si Niño Tolingin, vice chairman sa ReRe nagkanayon nga bisan pa og nigradwar na ang maong recovering drug addicts kinahanglan gihapon silang motambong sa regular session nila sa Barkadahay.

Ang Rehabilitation and Reintegration Program sa siyudad sa Bogo nagsaulog kini sa ilang ikaduha ka tuig niadto usab nga milabay’ng buwan sa Hulyo. (/BDB)(BANAT NEWS)