Mga kapitan tukoran og dormitory

CEBU, Philippines — Ang pagtukod og dormitory alang sa mga barangay officials sa lalawigan sa Sugbo maoy usa sa prayoridad karon ni Federation President-elect Celestino Tining Martinez III sa Association of Barangay Council (ABC) sa lalawigan sa Sugbo.

Ang dormitoryo giplanong tukoron aron adunay temporaryong ka estaran ang mga opisyal gikan sa lagyo nga barangay nga adunay transaksyon nga himoon sa Kapitolyo o sa Dakbayan sa Sugbo.

“Kon aduna silay transactions nga dili dayon mahuman they can stay at night hopefully aron ma-finish what they need or get what they need kay usahay lisod man gud kaayo especially if you are from the islands moari ka diri unya wala kay kapuy-an,” matud ni Martinez.

Ang duha ka andana nga building butangan og mga kwarto sama sa dormitory type o single type nga klase sa lawak. Kini gigahinan og di momenus  P25 milyones sa Kapitolyo ug gipaabot nga masugdan kini.

Gawas sa maong dormitory building, gitinguha usab sa Liga ng mga Barangay (LnB) sa Probinsya sa Sugbo nga makaestablisar na og internet networking ang ilang buhatan tali sa mga opisina sa nagkadaiyang barangay aron mas sayon ang pagpadala sa mga dokumento sama sa memorandum pinaagi sa email o sa internet.

Si Martinez uban sa iyang kampo napili pag-usab isip Federation President sa Lalawigan sa Sugbo sa iyang ikaduhang termino nga walay kontra.

Apil usab nga walay katigi mao sila si Raymond Calderon ang liga President sa lungsod sa Samboan nga maoy Vice President karon sa ABC,  ang auditor si Nerisa Arquillano sa lungsod sa San Francisco isla sa Camotes.

Samtang ang mga board of directors mao sila Scott Juvenal Chiong sa dakbayan sa Naga, Marietta Bucao sa Talisay City, Guillermo Caminero Jr. sa Argao, Joie Genesse Derama sa Boljoon, Bernabe Gonzalez Jr. sa Balamban, Wilfredo Diamante sa Tuburan, Vicente Fernandez sa Dumanjug ug Joseph Redula sa lungsod sa Alegria. (BANAT NEWS)