Maayong panahon masinati karon

CEBU, Philippines – Maayong panahon ang masinati sa pipila ka bahin sa nasud karon hangtud ugma human ang hanging habagat lang ang weather disturbance ang nakasulod sa Philippine Area of Responsibility.

Posibleng masinati ang init-init nga panahon diin anaa hinoon gihapon ang pagpanag-um ug ang posibleng katag-katag nga pag-ulan nga mahitabo kasagaran sa hapon o gabii tungod sa localized thunderstorm. Kini ang gilantawan nga dagan sa panahon alang sa Central ug Eastern Visayas ingon man ubang parte sa Luzon ug Mindanao.

Matud ni Engr. Alfredo Quiblat Jr. sa PAGASA-Mactan nga ang Western Visayas ug Western Luzon makasinati og moderate ngadto sa heavy rainfall sulod sa mga mosunod nga adlaw tungod sa presensya sa hanging habagat.

Ang Low Pressure Area nga gilantawan nga mamahimong bagyo ug mosulod unta sa nasud niadtong Martes apan nausab ang direksyon sa pag-irog niini ug wala hingpit nga nakasulod sa nasud ug nahimo kining tropical storm Jongdari ug gilantawang padulong sa nasud sa Japan.

Apan dili gihapon angay mokompiyansa ang mga mananagat nga molawig sa kadagatan sakay sa gagmay nga sakyanang pangdagat kay anaa gihapon ang paghangin nga makamugna og dos metros nga pagbalud.

Samtang gi-monitor sab sa PAGASA ang taas-taas nga total lunar eclipse nga posibleng makita sa mga Sugbuanon karong Sabado gikan sa ala una sa kaadlawon hangtud sa alas 6 sa buntag. (/GMR)(BANAT NEWS)