Selfie atol sa ironman gidili

CEBU, Philippines – Giawhag ang mga mosaksi sa Ironman 70.3 nga likayan ang pagkuha pag-selfie tunga-tunga sa rota sa bisekleta atol sa triathlon event.

Matud ni Jonathan "Joy" Tumulak, focal person on traffic management sa Probinsiya sa Sugbo, nga dili malikayan nga mokuha og hulagway ilabi na nga adunay mga artista nga moapil sa kalihukan apan kinahanglan nga ikonsiderar nga ang maong kalihukan usa ka kompetisyon ug posibleng makahatag og kahasol sa mga atleta ang mga tawo nga magsige og kuha og hulagway sa tunga og posible pa nga madisgrasya.

Ang Ironman 70.3 ipahigayon sa Mactan Island ug pipila ka parte sa Dakbayan sa Mandaue diin isirado ang Mactan-Mandaue Bridge.

Sa panahon nga adunay atleta nga madisgrasya o matumba atol sa lumba, matud ni Tumulak nga dili basta-basta motabang ang mga tawo nga mosaksi.

Nakasabot siya nga ang mga Pilipino natural nga motabang kun adunay aksidente sa dalan apan atol sa maong kalihukan dunay mga rescuers ug polis nga standby nga nakahibalo na sa unsay buhaton.May ambulansiya nga ibutang sa mga lugar nga agian nga kahibalo na kung asa ang duol nga tambalanan nga dad-on ang atleta ug makaagi ra sa rota.

Gipaabot ang grabeng trapik sa Dakbayan sa Lapu-Lapu gikan sa alas 5 sa buntag hangtud alas 12 sa udto nga maoy oras sa lumba. (/GMR)(BANAT NEWS)