Imprastraktura maoy gitutokan sa Lapu-Lapu

CEBU, Philippines – Ang pagpalambo sa serbisyo sa panglawas ug  ang pagtapos sa mga proyekto sama sa dugang edipisyo sa Lapu-Lapu City Hospital ug merkado publiko maoy gitinguhang mahuman ni Mayor Paz Radaza sa iyang katapusang  termino.

Kini maoy mga gihisgutan ni Radaza sa iyang State of the City Address (SOCA)  nga gipahigayon sa Hoops Dome niadtong  miaging adlaw  nga gitambongan sa mga sakop sa konseho, mga department head ug mga barangay opisyal.

Giangkon ni Mayor Paz Radaza nga kini maoy pipila lamang niya ka mga proyekto nga padayon pang gihimo.

Matud niya gawas sa paghuman sa maong mga proyekto palambuon usab ang serbisyo sa kagamhanan. Apil sa gipalambo ang kadalanan aron maluag ang kadalanan ug ang tinguha nilang mabutangan og monorail transit ang siyudad.

Dugang pa niya nga ang  Japan International Cooperation Agency  (JICA) kasamtangan karon naghimo og mga pagtuon labot sa kaugmaran sa Mandaue Lapu-Lapu Link Bridge nga mokonektar  sa duha ka siyudad.

Nagtinguha ang siyudad nga makabaton ang Lapu-Lapu City Hospital og Dialysis Center, Intensive Care Unit  ug ophthalmology department. (/IBM)(BANAT NEWS)