76 ka balay sa yuta sa UP di pa ma-demolish
CEBU, Philippines – Dili morekomendar og demolisyon ang Division for the Welfare of the Urban Poor (DWUP) sa 74 ka illegal structures sa Barangay Lahug, ning siyudad hangtod nga ang University of the Philippines sa luna makahatag og relocation site sa mga apektadong pamilya.
Nagkanayon ang pangulo sa DWUP Atty. Meriam Fernandez gikinahanglan ang clearance gikan sa siyudad sa dili pa ang Presidential Commission for the Urban Poor (PCUP) makaguba sa kabalayan.
“Dili man pud ta kahatag og certification or recommendation to PCUP to proceed with the demolition unless ma-ensure nato nga sakto ang relocation site,” asoy ni Fernandez.
Niadtong Pebrero 2, 2018 ang Regional Trial Court Branch 19 Cebu City mi-grant sa motion for the issuance sa writ of demolition sa UP human ang writ of execution nga gi-isyu sa korte sa sayo pa wala ma-implementar gumikan sa pagmagahi sa mga apektadong pamilya pagbiya sa lugar. Gawas niini, ang defendants pakyas sab matod pa pag-file og temporary restraining order (TRO) o injunctive order sa korte.
Ang UP mi-file og petition aron ang property magamit alang sa konstruksiyon sa bag-o nilang high school building nga gipunduhan sa national government.
Sigon ni Fernandez, nakig-alayon na sila karon sa UP labot sa relokasyon sa mga apektadong pamilya.
Apan sa pagkakaron, 24 pa lang ka home lots sa Barangay Busay ang nakita sa UP ug dili paigo sa kapin 70 ka pamilyang maapektahan.
Gumikan matod sa kakuwang sa relocation ang DWUP mipasalig nga dili mo-isyu og rekomendasyon pagguba sa kabalayan. (/IBM)(BANAT NEWS)
- Latest
