Container vans himoong holding center sa CICL
CEBU, Philippines – Gipaabot nga ma-deliver na sa Probinsiya sa Sugbo ang pito ka container vans nga gipalit nga magsilbing temporaryo nga kapuy-an o holding area sa kabatan-onan nga makalapas sa balaud.
Matud ni Bise Gobernador Agnes Magpale, chairman sa Provincial Women’s Commission (PWC), nga aduna nay napilian nga kontraktor nga nisaad nga sa Septiyembre maabot na ang mga vans.
Matag container van nagkantidad og dili mominus tunga sa milyon ka pesos diin maigo ang 12 ka bata ug kompleto sa kahimanan sama sa pansayan ug higdaanan.
Ang gobernador nagkanayon nga daku ang matabang sa maong mga container vans ilabi na karon nga pangdakpon ang mga tambay sa gawas diin pipila nga anaa pirme sa gawas panahon sa kagabhion mga batan-on.
Ang maong container vans adto kini sa mga lungsod ug dakbayan nga adunay luna nga ikahatag kung asa ibutang ang holding centers.
Matud ni Magpale nga ang mapilian nga lungsod ug siyudad mao sab ang moabaga sa installation sa container van.
Samtang gipaabot usab nga makatukod na karong tuiga ang Probinsiya sa Sugbo og Bahay Pag-asa Center sa luna niini sa Inayagan, Dakbayan sa Naga alang sa mga bata nga nakalapas sa balaud o ang gitawag og Children in Conflict with the Law (CICL).
Ang Probinsiya sa Sugbo naggahin og P10 milyones alang sa maong pasilidad diin adto ibutang ang mga bata nga nag-edad og 15 ngadto sa 17-anyos o kadtong mga nasuspenso lang ang silot nga pagkapriso tungod kay menor de edad kini sa pagbuhat sa krimen. (/GMR)(BANAT NEWS)
- Latest
