Protected areas apektado sa development?

CEBU, Philippines — Susihon sa Cebu City Environment and Natural Resources Office (CCENRO) ang tanang gihimo nga kalambuan sa bukirang barangay ilabi na kadtong mga naila nga protected areas.

Ang Central Cebu Protected Landscape-Protected Area Management Board (CCPL-PAMB) nakadawat og taho nga giingong adunay daghang development nga nahitabo sa protected areas sa mountain areas sa siyudad. Subay niini ang CCENRO giawhag nga mopahigayon og inspeksyon ug gihatagan og direktiba labot sa paghatag og saktong permit sa tanang proyekto diha sa mga protected area nga nahimutang sa mga ‘shaded parts’.

Basi sa rekord,  adunay 23 ka protected areas sa siyudad nga gilangkuban sa kabarangayan sa Adlaon, Agsungot, Babag, Bonbon, Buhisan, Buot, Cambinocot, Guba, Lusaran, Mabini, Malubog, Pamutan, Paril, Pung-ol Sibugay, Sapangdaku, Sinsin, Sirao, Sudlon I, Sudlon II, Tabunan, Tagba-o, Taptap ug Toong.

Nagkanayon ang pangulo sa CCENRO nga si Nida Cabrera nga susihon nila kon ang naasoy nga developments sa bukirang mga barangay nasulod ba sa protected areas.

Kadtong mga proyekto nga anaa sa hurisdiksiyon sa protected areas, kinahanglan mangayo og clearance ug mokuha sa mga gikinahanglang permits sa kagamhanan sa siyudad ug sa Department of Environment and Natural Resources (DENR)-7 subay na sa nakalatid sa Central Cebu Landscape Act of 2007.

Nakalatid sa maong akta nga, “for the protection, conservation, maintenance, rehabilitation and sustainable development of the Central Cebu Protected Landscape (CCPL), especially for its crucial role and significance”.

Midugang kini nga aduna nay nahuman nga development ug awhagon sa CCENRO ang tag-iya niini nga ihunong ang operasyon ilabi na nga giingong naapektuhan na ang mga tinubdan sa tubig sa bukid.

Nunot niini, si Mayor Tomas Osmeña miisyu og memorandum nga nagpahibawo sa tanang department heads nga makig-alayon sa CCENRO mahitungod sa pag-develop og proyekto sa protected areas sa siyudad. (BANAT NEWS)