Traffic education itudlo sa mga tinun-an

CEBU, Philippines – Aron adunay igong kaalam ang mga tinun-an sa Lalawigan sa Sugbo kalabot sa balaud sa trapiko, nagplano karon ang Kapitolyo nga ipaubos ang mga estudyante sa usa ka seminar kalabot sa traffic management.

Kagahapon dili mominus 20 ka empleyado sa Kapitolyo gikan sa Provincial Disaster Risk Reduction and Management Office (PDDRMO), Provincial Information Office, Provincial School Board, ug Provincial Sports Commission ang gibansay isip mga lecturers ngadto sa mga bata kalabot sa traffic management.

"Basic ra to nga training all about traffic management, traffic direction and control unya ug safety pud sa mga bata nga naa sa dalan," matud ni Jonathan "Joy" Tumulak, ang focal person on traffic management sa Kapitolyo.

Sunod bulan gipaabot nga ipatuman sa Kapitolyo ang seminar sa mga tinun-an kalabot sa balaud sa trapiko diin unahon ang mga tinun-an nga anaa ang mga eskwelahan daplin sa dalan.

"Gituyo sa probinsiya nga Bisaya version aron sayon masabtan para sa mga bata, unya sayon siya masabtan sa mga tanod," matud ni Tumulak. Sumala ni Tumulak nga importante nga adunay edukasyon sa trapiko ang mga bata ilabi na nga nakita nga delikado alang sa mga tinun-an ilabi na sa elementarya ang pagtabok-tabok sa dalan.

"Naobserbahan nga dunay mga bata nga kalit lang nga nitabok, dunay dili moagi sa skywalk, duna mga bata nga dili moagi sa pedestrian lane unya duna pud ubang mga bata nga wala kaila kun unsa ni nga traffic signs, so pinaagi sa pagpahibalo sa mga bata sa mga traffic signs, sila mismo sa ilang kaugalingon makalikay sa disgrasya," matud ni Tumulak. (/GMR)(BANAT NEWS)