Local Aids Council ipatukod sa Sugbo

CEBU, Philippines — Giawhag ang mga lokal nga kagamhanan sa Lalawigan sa Sugbo sa tigpamaba sa Bill and Melinda Gates Foundation, Greggy Senados, nga magtukod og Local Aids Council aron hingpit nga matutukan ang nagpadayon nga pagtaas sa kaso sa HIV/AIDS.

Matud ni Senados nga ang pagtukod sa Local Aids Council kabahin sa ilang subsob nga kampanya ug pagpanghatag og ayuda sa mga lokalidad aron batukan ang maong sakit.

Si Senados nitug-an nga aduna lay lima ka siyudad ug duha ka lungsod lukop lalawigan ang adunay Local Aids Council.

Sumala pa ni Wilfredo Salgado, HIV Focal Person sa Cebu Provincial Health Office, nga daku og matabang ang pagpatukod sa maong konseho kay matutukan niini dili lang ang kaso sa AIDS apan lakip na usab ang uban health concerns.

Dugang ni Salgado nga dili sab sayon ang pagtukod niini kay nagkinahanglan kini og budget gikan sa mga lokal nga kagamhanan.

Awhag ni Salgado sa katawhan sa kalungsuran ug siyudad nga tanan district hospitals lukop lalawigan magtanyag og free HIV testing ug walay angay ikahadlok ang mopaubos niini tungod kay confidential man ang mga impormasyon nga ihatag sa pasyente sa mga tambalanan. (/GMR)(BANATNEWS)