‘Persons of interest’ pa sa duha ka kasong pagpatay

CEBU, Philippines – Gibutyag sa hepe sa Pari-an Police Station, Chief Insp. Kenneth Paul Albotra, nga aduna na silay tulo ka persons of interest nga gitutokan nga nipusil patay kang kanhi kagawad sa Barangay Lorega-San Miguel nga si Glenn Mark Manal sa ilang rogues gallery.

Niangkon si Albotra nga kuwang ra ang 48 ka oras nga gihagit ni Senior Supt. Royina Garma, ang direktor sa Cebu City Police Office, aron sulbaron ang kaso.

Samot nga giingong wala nakig-coordinate ang kabanay sa biktima sa paghatag og mga impormasyon nga makatabang sa kaso sama sa kon nakadawat ba kini og mga pagpanghulga kaniadto.

Hangtud kagahapon, si Albotra, human sa 12 ka oras sa nahitabong krimen, nibutyag nga anaa pa sila sa 30 porsiyento sa pagsulbad niini. Dugang gitug-an niya nga naglisud sila sanglit walay nakuhang tin-aw nga kuha sa closed circuit television (CCTV) camera sanglit brownout niadtong tungora.

Gibasehan lang nila ang paghulagway sa nagpailang saksi sa krimen.

Giingong ang tulo nga gitudlo sa saksi nga adunay kamay-ong sa mamumuno nga anaa sa ilang rogues gallery mga tirador sa mga inilang drug suspects.

Gawas sa anggulong pagkalambigit sa biktima sa drugas, wala gitangtang sa kapolisan ang anggulo sa politika ug sa posibleng personal nga kabingkil niini.

Si Manal gikan pa nibilar sa haya ni Russ Aquino, 48, dihang gipusil patay sa usa ka wala mailhing mamumuno nga posibleng nagsunod ra kaniya gikan sa haya sa Imus. Si Aquino kinsa gituohang nalambigit sab sa drugas ang gipusil patay sab sa wala pa mailhing mamumuno sulod sa Lorega Public Market niadtong Hulyo 5.

Matud ni Albotra nga wala pa matumbok kon unsa gyud ang koneksyon sa duha.

Samtang sa Tabuelan, namahayag ang tigpamaba sa Tabuelan Police Station, PO2 John Mark Asendiente, nga ang kakompetensya sa negosyong baboy’ng linapa sa merkado ni Police Officer 1 Avita Sarzuelo ang ilang gitutokan karon nga person of interest sa pagpatay sa polis niadtong Huwebes sa buntag.

Ang kompetensya mao kadtong giingong gikulata ni Sarzuelo tungod sa away sa rasyon sa baboy niadtong piyesta sa Tabuelan, pipila ka semana una pa nahitabo ang krimen.

Gipadayag ni Asendiente nga wala gihapon nila gitangtang ang anggulo sa drugas.

Namahayag ang direktor sa Cebu Provincial Police Office, Senior Supt. Manuel Javier Abrugena, nga nitumaw ang pangalan niini gikan sa mga dinakpan nga mga durugista. (/GMR)(BANAT NEWS)