Duha ka bata napusilan

CEBU, Philippines – Nagpabilin sa tambalanan ang duha ka batang managsuon human nangaigo og saag nga bala sulod sa ilang panimalay sa may Proper Matab-ang sa Dakbayan sa  Toledo kagahapon sa kaadlawon.

Nakaangkon og samad pinusilan mao ang 10-anyos ug 7-anyos  niining manghod nga babaye puros residente sa maong lugar. Samtang ang mga responsable sa pagpamusil wala pa mailhi sa kapolisan.

Matud pa ni Senior Police Officer 3 Thule Tajanlangit, imbestigador, sa Toledo City Police Station nangatulog na ang mga bata kuyog sa ilang amahan ug laing kabanay sud sa ilang balay sa dihang adunay buto sa armas nga ilang nadungog gikan sa gawas.

Sumala pa ni Tajanlangit, human sa buto nakadungog ang amahan nga miping-it ang iyang mga anak ug sa iyang pagsusi nagkadugo ang duha.

Ang batang lalaki may samad sa tuong abaga samtang ang babaye naigo sa iyang wala nga kamot ug sa wala nga paa.

Dali nga gidala sa Balamban District Hospital ang mga bata ug pabilin kining nagpaalim sa mga samad pinusilan nga naangkon.

Padayon pa ang imbestigasyon sa kapulisan bahin sa maong hitabo apil na ang pagsubay kon naa bay nakaaway ang mga ginikanan ug ubang sakop sa pamilya sa mga bata. (/IBM)(BANAT NEWS)