Taga Bato nangayo og hustisya
CEBU, Philippines — Nagpahigayon og signature campaign ang residente sa Bato, Ermita, Siyudad sa Sugbo sa pagpangayo og hustisya sa kamatayon sa 4-anyos nga si Bladen Skyler Abatayo kinsa napagan sa police operation niadtong Martes.
Ang mga pirma ipadala ngadto kang Commissioner Jose Luis Martin Gascon sa Commission on Human Rights.
Ang mga residente nitug-an nga walay nahitabo nga operations ug gani walay kaguliyang nga ilang nakita ug nakadungog lang sila og usa ka buto diin maoy ilang pagtuo nga gikan sa nipaka nga kuryente. Dili sila buot nga duna pay susamang insidente diin dunay bata nga maamong ug mamatay nga walay ikasukol.
Ang amahan sa bata nga si Mark kinsa nagselebrar sa iyang adlaw nga natawhan kagahapon nitug-an nga sakit kaayo ang iyang regalo nga nadawat human daghan plano niya ang napalong tungod sa kamatayon sa iyang kamaguwangan nga anak nga tinun-an sa nursery sa usa ka pribado nga tunghaan.
Si CHR-7 Chief Investigator Leo Villarino nitug-an nga mohimo sila og kinaugalingong imbestigasyon sa insidente. Gibarugan ni Police Regional Office-7 director, Chief Supt. Debold Sinas, nga lehitimo ang operasyon niadtong Martes diin napagan patay si Abatayo.
"Way problema. They could investigate," matud ni Sinas.
Atol sa operasyon giingong nibunot og armas ang usa sa upat ka suspek hinungdan nga gilayog kini sa polis. Atol sa nilayogay giingong nibuto ang armas sa suspek nga maoy gituohang nakaigo sa bata.
Nakuha sa maong lugar ang balor P85 mil nga shabu samtang nakaikyas ang mga suspek. (GMR) (BANAT NEWS)
- Latest
