Abogado patay, asawa angol

CEBU, Philippines — Patay ang usa ka inilang abogado dinhi sa Sugbo samtang naangol ang iyang asawa human usa ka lalaking giingong nagpatuong kliyente ang mipusil kanila diha sa sud sa ilang balay diha sa 4th Street, Singsong Compound sa Barangay Guadalupe, ning Dakbayan sa Sugbo.

Ang namatay mao ang  69 anyos nga abogado nga si Salvador Solima samtang kritikal ang iyang asawa nga si Verosse Solima.

Ang duha gidala dayon sa Chong Hua Hospital apan paglabay sa pipila ka minutos gideklarar sa mga doktor ang abogado nga nakabsan kini sa kinabuhi.

Sumala pa sa post sa Facebook Account sa DYLA kagabii, alas 6:58 sa gabii gideklarar nga patay sa attending physician si Solima. Gikompirmar usab kini sa hepe sa Guadalupe Police Station nga si Police Senior Insp. Eduard Sanchez nga nakahinabi sa Banat News. Matud pa niya adunay nitawag kanila nga nagpahibalong gipamusil ang managtiayon sa sud sa ilang panimalay sa nahisgotang dapit.

Matud ni SPO3 Rommel Bancog sa Cebu City Police Office (CCPO) Homicide Section nga naigo sa tangkugo si Solima.

Samtang ang iyang asawa anaa sa kritikal nga kondisyon karon, ug kinahanglan ipaubos sa operasyon.

Si Solima maoy legal counsel ni Jocelyn Mendoza, ang common-law wife sa kanhi barangay kapitan sa Ermita nga si Felecisimo “Emok” Rupinta, kinsa gi-ambush patay didto sa Liloan.

Padayon pa karon nga nihimo og imbestigasyon ang kapulisan sa motibo sa pagpamusil lakip ang pagsubay sa uban pang mga sensitibong kaso nga gikuptan sa abogado ug ang kabahin sa report nga duna kini hulga sa kinabuhi nga nadawat.  (BANAT NEWS)