77 Job orders sa Talisay “adik”

CEBU, Philippines – Nakurat ug nasubo si Talisay City Mayor Eduardo Gullas dihang 77 ka mga job order nga kawani sa Talisay City Hall ang nagpositibo sa paggamit sa ilegal nga drugas human sa gipahigayong Mandatory Drug Testing nga gihimo sa City Health Office niadtong miaging semana.

Si Dr. Lino Alanzado, pangu sa CHO nagkanayon nga makaluluoy ang gidaghanon sa mga nakit-an nga nagpositibo.

Matud pa ni Gullas nga sakit pamalandungon ang nigawas nga resulta sa drug test. Sumala pa sa mayor nasayod siyang nagkinahanglan gyud og trabaho ang maong mga kawani apan tungod sa nigawas nga resulta sa drug test kinahanglan nilang dawaton ang silot.

Si Gullas miingon nga siya mismo andam magpa-drug test ug kon mapamatud-an nga siya positibo sa paggamit niini andam siya nga mo-resign isip mayor.

Si Emely Cabrera, pangu sa Human Resource Management nagkanayon nga ang nagpositibo mahimong dili na makabalik sa ilang trabaho gawas lang kon sila magpaubos sa rehabilitasyon sa City Social Welfare.

Sa laing bahin, usa sa mga kawani sa Bureau of Jail Management and Penology kon BJMP 7 nagpositibo sa gihimong drug test sa ilang rehiyonal nga buhatan, samtang gipaubos usab sa kinalit nga drug test ang 50 ka mga piniriso ug personnel sa Mandaue City Jail Female Dormitory kagahapon.

Si Senior Inspector Pauline Bajar, Mandaue City Jail Warden maoy nangulo sa kinalit nga drug test, diin sa 15 ka mga personnel usa ang wala nakaapil kay nipaubos sa neuro exams sa ilang buhatan.

Matud pa ni Bajar ang drug test himuon kada upat ka buwan nga kabahin sa ilang internal cleansing ug pakigbatok sa illegal nga drugas.

Gawas sa mga personnel, laing 50 ka mga priso ang gipaubos sa random drug test. (reports nilang Rowena Capistrano,  Romeo T. Limpangog /IBM)(BANAT NEWS)