Lalaki gipusil patay sa mga batan-on

CEBU, Philippines – Patay ang usa ka lalaki nga gituohang adunay deperensya sa pangisip human kini giingong gipusil sa wala mailhing mamumuno diha sa Barangay Vito sa Lungsod sa Minglanilla niadtong Miyerkules sa gabii.

Ang nakalas gibana-bana anaa sa pangidaron nga 25 ngadto sa 30 anyos, 5’3 ang gitas-on ug naka-pants kini og itom. Samtang dunay mga nakakita nga ang nagpusil sa biktima duha ka mga batan-on nga gibanabanang 20-anyos ang pangidaron.

Matud pa ni Police Officer 2 Jefferson Base, Desk Officer sa Minglanilla Police Station, base sa ilang initial nga imbestigasyon nakadungog kini og boto sa armas ang usa ka caretaker og tindahan sa lugar.

Sa paggawas niini aron susihon ang buto nakita niini ang duha ka mga batan-on nga nag- iyahay og panagan ug nangambak sa koral.

Ang biktima nakaangkon og samad pinusilan sa iyang ulo nga nilapos sa walang bahin sa aping, diin wala pa usab masuta kung unsa nga klase sa armas ang gigamit tungod kay walay kabhang sa bala nga nasakmit.

Dali pa unta nga gidala sa Minglanilla District Hospital ang biktima apan dali usab kining gideklarar sa mga doctor nga patay na.

Blangko pa ang kapulisan sa motibo sa maong krimen. (Rowena D. Capistrano/IBM)

30 illegal fishers nakasohan

Moabot na ngadto sa 30 ka kaso ang napasaka sa Coastal Law Enforcement sa Provincial Environment and Natural Resources Office (PENRO)  batok sa mga illegal nga nanagat sa kadagatan dinhi sa probinsya.

Matud ni Jayson Lozano ang pangulo sa PENRO nga gikan sa bulan sa Enero hangtod Hunyo  ubay ubay na nga kaso paglapas sa Fisheries Code.

Ang maong mga kaso ilang gipasaka ngadto sa Bureau of Fisheries and Aquatic Resources (BFAR) samtang ang kasong kriminal gipasaka ngadto sa piskaliya.

Matud sa pangulo sa PENRO nga kasagaran kalapasan nga nahimo sa mga mananagat mao ang pamaagi sa panagat sama sa paggamit og dinamita samtang ang uban nangisda sa mga protected area.

Pipila usab sa mga nadakpan sa PENRO taga silingan nga lalawigan sa Sugbo sama sa Negros Occidental.  Ang uwahing napasakahan og kaso sa PENRO mao ang usa ka Elvie Villarino,  babaye nga taga Cadiz City Negros Occidental.

Ang commercial boat niini sakay ang duha ka tripulante nga giila nga sila Joselito Teodoso ug Glenn Chavez  nga parehong taga Negros Occidental, nasakpan sila nga ilegal nga nanagat sa kadagatan sa  Barangay Kinatarcan lungsod sa Sta Fe. Bantayan Island.  “The said commercial fishing boat engaged in fishing activity without securing first the necessary permit or license from the authorities concern,” matud pa sa affidavit nga gisumiter sa PENRO ngadto sa piskaliya. Nasakmit gikan sa maong tripulante ang duha ka banyera sa lain lain klaseng isda. (/IBM)(BANAT NEWS)