Suspek pagpatay sa kapuyo nadakpan
CEBU, Philippines – Nagtingkagol sa prisohan ang usa ka lalaki nga adunay upat ka mga warrant of arrest human kini nadakpan sa mga sakop sa Oplan Tracker Team sa Minglanilla Police Station niadtong Miyerkules sa hapon sa may Barangay Pakigne sa maong lungsod.
Ang nadakpan mao si Glen Vestil, alyas Glenn, residente sa maong lugar. Siya gidakop sa grupo sa hepe sa kapolisan sa lungsod nga si Police Chief Inspector Verniño Noserale.
Si Vestil mao usab ang suspek pagpusil patay sa iyang kapuyo nga si Jael Pino niadtong Enero 8, 2015.
Si Vestil, adunay warrant of arrest alang sa criminal case para sa Robbery with Violence and Intimidation of Person ug kasong Theft.
Sumala pa ni Noserale, atol sa pagkuha og dugang mga impormasyon bahin sa dinakpan didto nila nasayran nga aduna pa kini laing warrants of arrest sa kasong Violation sa RA 9262 ug kasong murder, human kini maoy nipatay sa iyang kapuyo.
Ang dinakpan ihatod didto sa korte diin nag-atubang kini sa iyang mga kaso. (/IBM)(BANAT NEWS)
- Latest
