Nganong nakagawas man si Gary Go sa prisohan?

CEBU, Philippines – Susihon sa kapolisan kon ngano nga ang Filipino-Chinese nga si Gary Go nga napatay didto sa Cordova kaniadtong miaging Martes nakagawas man sa bilanggoan bisan og nasakmitan kini og usa ka sakong shabu didto sa kaulohan kaniadtong 2015.

Base hinoon sa balaod bisan og “no bail” nga kaso nga gipasaka batok sa akusado, mahimo gihapon nga katugotan kini sa hukmanan nga makabutang og piyansa kon sa pagtimbangtimbang sa huwes, dili kaayo lig-on ang mga ebidensya batok kaniya.

Matud ni Cebu Provincial Police director Manuel Abrugena nga ang kalambigitan ni Go sa negosyo sa ilegal nga drugas maoy gitutokan pag-ayo sa mga imbestigador kay posible nga mao kini ang rason nga siya gipatay.

Si Go paingon na unta nga mosakay sa iyang kotse didto sa Sitio Agad-Agad, Barangay Poblacion, lungsod sa Cordova niadtong Martes diha nga giduol sa mga wala hiilhing tawo ug gipusil sa makadaghang higayon.

Taga Angeles City si Go, apan diha na siya manimuyo sa Cordova uban sa iyang puyopuyo, nga gisusi usab sa kapolisan ang iyang background.

Sutaon usab sa kapolisan didto sa Land Transportation Office (LTO) kon kang kinsa nga sakyanan ang gisakyan sa mga kriminal pag-ikyas nga adunay plaka nga BOO-982. (/RUB)(BANAT NEWS)