50 nasudla’g bad spirit?

CEBU, Philippines – Dili momenus 50 ka mga tinun-an sa Ronda National High School sa Ronda ug Colawin National High School sa Argao ang giingong “nangasudlan og dautang espiritu.”

Giingong nasudlan og daotang espiritu ang maong mga tinun-an apan si  SPO1  Edmund Obiso,  desk officer sa Ronda Police Station nihulagway nga wala siyay nakita nga bata nga mura og nasudlan og  espiritu.   “Naa kuno silay nakita nga figure nga bata nga blurred ang nawong dili makita dili nila makuan unsa nga klase nga bata.

Mao to nihilak sila, unya daghan sila nga grupo nga nakakita sila. Pero ingon nga na-possess, wala koy nakit-an didto nga bata nga murag nigahi or nagsiga og mata, wala may possess nga ing-ana, puro ra man sila nanghilak,” matud ni Obiso.

Matud ni Obiso nga nahitabo kini alas 10 sa buntag kagahapon sulod sa eskwelahan sa Ronda National High School. Pipila sa mga bata nga nanghilak anaa sulod sa usa ka lawak samtang ang uban anaa sa gawas.

Gidala ngadto sa Rural Health Unit (RHU) ang mga tinun-an nga nag-edad 12 hangtod 17 anyos.  Pipila sa mga tinun-an gidala usab sa simbahan kon diin gibadlisan sila sa pari og Krus sa agtang gamit ang bendetadong lana alang sa mga masakiton.

Ang doktor sa RHU nga ilang gipangutana miingon nga “hyperventilation” ang nahitabo.

“Ang findings sa doctor, hyperventilation, tungod kuno sa kainit kay sa usa ka room 53 kuno ka estudyante,” matud ni Obiso.

Ang PNP ug ingon man ang Bureau of Fire Protection (BFP) mopahigayon unta og earthquake drill sa maong eskuylahan apan tungod sa hitabo wala mahinayon.

Samtang didto sa Colawin National High School, di momenus 20 ka mga tinun-an usab sa high school ang nakasinati niini kagahapon sa hapon.

Usa sa mga tinun-an nagkanayon nga ang iyang classmate nga babaye maoy una nga nihilak ug sa dihang ilang giduol apil usab sila nanghilak ug nahadlok.

“Nakakita ko og babaye pero nagtalikod lang siya, unya dili niya ipakita ang iyang nawong, dayon magsige siya og ingon nga ‘dad-on ko niya.’ Moingon siya nga ali diri kuyog, unya dili gyud ko pugngan gyud nako ang akong kaugalingon nga dili mokuyog niya.

Unya kusgan na kaayo ko ganina,” saysay pa niini sa gisulti sa babayeng classmate. Matud pa nga human sa maong hitabo namuypoy siya ug nanglaylay ang iyang batiis.

Si Colawin Barangay Kapitan Glenda Albeos nagkanayon nga ang ubang mga tinun-an gidala sa mananambal samtang ang uban gidala sa Isidro Kintanar District Hospital sa Argao. Gikanselar usab ang klase sa Colawin National High School kagahapon.

Mass hysteria

Samtang si Fr. Virgilio Dolloso, Kura Paruko sa Our Lady of Sorrows Parish Ronda, nitug-an sa Banat News nga sulod sa upat ka tuig niyang pangalagad sa maong parokya, kagahapon pa siya nakasugat og susama niini. Gitug-an ni Dolloso adunay mga nagsyagit-syagit, adunay nangisog hinungdan ilaha kining giampoan ug gibenditahan.

Matud pa ni Dolloso, tanan mga tawo nga nangadto sa simbahan nitabang sa pag-ampo ug human mokalma ang mga bata gipangdala sila sa mga ginikanan.

Siya mihulagway nga susama og mass hysteria ang nahitabo nga dili niya maesplikar ang panghitabo. Matud niya hasta siya naluya apan pag-ampo maoy iyang gipatigbabaw ngadto sa tanan. (Rowena Capistrano/IBM)(BANAT NEWS)