Mga pari di armasan

CEBU, Philippines — Ang mga kadagkuan sa simbahan ug mga layko dili pabor nga armasan ang mga kaparian bisan pa man sa sunod-sunod nga pagpamatay sa mga pari.

Matud pa ni Bishop Oscar Florencio ang Auxiliary Bishop of the Roman Catholic Archdiocese of Cebu ug kasamtangan nga Apostolic Administrator of the Military Ordinate of the Philippines.

Matud ni Bishop Florencio dili siya pabor nga adunay armas ang mga kaparian tungod kay ang tawo adunay hinagiban andam gayud pagsukol bisan og adunay laing dalan nga mao ang dayalogo.

Dugang pa ni Florencio kon armado ang pari susama og mawala ang ilang pagkapari nga andam mosakripisyo sa ilang kinabuhi.

“The priest should be a man of peace. And because of that he trusts only in the Lord not on arms and weapons,” matud pang Florencio.

Samtang ang pangulo sa Commission on the Laity, Fe Barino, nitug-an nga kinahanglang mag-ampo nga malamdagan ang mga hunahuna sa mga tawo nga adunay dakong kalagot ug kayugot sa mga kaparian.

Sama ni Florencio, si Barino miingon nga dili maayo nga magtinil og armas ang mga pari kay ang pag-ampo ug pagsakripisyo maoy ilang hinagiban. Tulo na ka mga pari sa Romano Katoliko ang gipamatay sukad sa nilabay nga tuig, ang bag-o mao ang pagpatay sa pari sa Nuve Ecija nga si Padre Richmond Nilo niadtong Hunyo 10 sa lungsod sa Zaragoza sa maong probinsya.

Niadtong Abril 29, ning tuiga gipatay usab si Padre Mark Ventura didto sa Cagayan human kini nagmisa ug niadtong Disyembre 5, laing pari usab sa Nueva Ecija ang gipatay nga si Padre Marcelito Paez.

Kritikal kaayo ang Simbahan sa pipila ka mga palisiya sa administrasyon sama sa war on drugs ug human rights abuses.

Ang mga opisyal sa Malacañang nagduda nga gituyo kini sa mga “criminal elements” aron gubaon ang unta hinayhinay nga panag-uliay sa maayong relasyon sa gobiyerno ug sa Simbahan. Usa ka Senate inquiry na ang gitakdang himuon aron tukion ang kabahin niini ug gipaabot nga ipatawag ang mga opisyales sa kapolisan ug simbahan. (BANAT NEWS)