‘Adis-adis’ hayan naa sab sa ubang tunghaan

CEBU, Philippines — Wala gisirhan sa kapolisan sa Dakbayan sa Talisay ang posibilidad nga adunay mga tinun-an sa nagkadaiyang tunghaan nga nabuang sa ginadiling drugas.

Matud ni Insp. Rene Cerna, deputy chief sa Talisay City Police Station, nga ang nahitabo sa Siyudad sa Sugbo dili layo nga nahitabo sab sa Siyudad sa Talisay.

Kini tungod sa padayon pa gihapong pagdaghan sa kaigsuonan nga naa sa negosyo sa ilegal nga drugas bisan pa man sa hugtanon nga kampanya batok niini. Matud ni Cerna nga andam ang ilang buhatan nga motabang sa mga magtutudlo ingon man mga ginikanan sa pagpasabot sa kabataan sa epekto sa ginadiling drugas sa ilang kalawasan.

Gani uyon sab siya sa laraw sa Department of Education sa pagpaubos sa random drug test sa mga gidudahang adis-adis nga tinun-an ingon man mga magtutudlo.

Nasayran nga unom ka tinun-an sa senior high school ang nasikop samtang naghithit og marijuana luyo sa Cebu City Sports Center.

Iyang giawhag ang tanan nga motawag ug mo-report ang katawhan sa mga panghitabo sa ilang lugar aron mahatagan og aksyon. (BANAT NEWS)