Nanglabni sa bag sa call center agent nasikop

CEBU, Philippines – Nadakpan sa nagpatrolya nga kapolisan ang usa ka tawo nga nanglabni og shoulder bag sa babayeng call center agent didto sa Sacris Road, Barangay Bakilid, Dakbayan sa Mandaue kagahapon sa kaadlawon.

Si Police Officer-4  Enrico Iway sa Presinto 2 sa Mandaue City Police Office (MCPO), miila sa ilang nadakpan nga mao si Dier Carin Mata, 25,  ulitawo ug walay trabaho nga taga Nahalad, Dakbayan sa Carcar. Matud ni SPO4 Iway nga ang biktima nga si Samantha Francin Cañete, 32, dalaga nga nagpuyo sa maong dapit, nanaog sa usa ka PUJ gikan sa iyang trabaho.

Sa paglabang sa dalaga sa pikas habig sa karsada, kalit lang gisugat siya ni Mata ug gilabni ang gisambilay niining bag ug tulin kaayong midagan.

Dugang ni SPO4 Iway nga ang biktima nakalitan kaayo sa hitabo ug igo na lang sa pagsinggit og pagpangayo’g tabang.

Si PO2 Niño Gorneo ug mga kauban atol nga nahiagi sa maong dapit ug abtik nilang gigukod ang misibat nga snatcher, ug malampusong midakop ni Mata. Ang bag ni Cañete nga may sulod nga kwarta, cellphone, power bank ug mga alahas, nabawi gikan sa dinakpan nga gitanggong karon sa bilanggoan ug pasakaan kini og kaso sa korte ugma. (/RUB)(BANAT NEWS)