Lahugay ipatuman sa Hunta Probinsyal

CEBU, Philippines – Posibleng adunay mahitabong lahugay  aron pag-ilis og mga chairman sa committee sa Sangguniang Panlalawigan (SP) sanglit aduna may bag-ong miyembro nga molingkod sunod bulan.

Sa pagkakaron, adunay 16 ka miyembro ang SP. Ang 14 niini mao ang tagduha ka representante sa pito ka legislative districts samtang ang nahibilin nga duha alang sa presidente sa Association of Barangay Captains (ABC) ug  sa presidente sa Philippine Councilors League (PCL).

Sa pagbalik sa Sangguniang Kabataan (SK), usa ka bag-ong posisyon ang madugang sa SP. Niadtong Hunyo 8, gipili si Jerico Rubio nga taga-Malabuyoc isip presidente sa SK Federation sa probinsya.

Mitataw si Bise Gobernador Agnes Magpale nga sa panahon nga molingkod na si Rubio sa SP ihatag kaniya ang chairmanship sa Committee on Youth and Sports Development nga kasamtangang gikuptan ni SP Member Miguel Magpale.

Dugang sa bise gobernador nga ‘posibleng’ aduna pay mausab nga committee chairmanship apan sa pagkakaron wala pa nila nahisgutan sa SP kung unsang committees ang adunay himuong kausaban sa liderato.

Sa laing bahin, mipasalig si Magpale nga tabangan nila si Rubio nga maka-adopt sa bag-ong posisyon niini sama sa pagpaapil sa maong batan-on sa mga training sama sa unsaon ang mga parliamentary procedure ug paghimong resolusyon.

Sa interbyu kang Rubio, miangkon siya nga kulang pa siya’g training ug kasinatian sa parliamentary procedures kay una pa niya kini nga higayon nga misulod sa politika. (/IBM)(BANAT NEWS)