Managbayaw gipatay samtang natulog

CEBU, Philippines — Samtang tulo ang patay sa duha ka managlahing pagpamusil nga nahitabo dinhi sa Sugbo diin ang duha nangatulog  dihang gipamusil didto sa lungsod sa barangay Liong Dumanjug niadtong Domingo sa kaadlawon. Sa Dumanjug, ala 1:30 sa kaadlawon, gipusil patay ang managbayaw nga silang Nancy Baya ,34, ug Arnel Baya ,40.

Sumala pa sa hepe sa Dumanjug Police Station nga si Police Senior Insp. Gilfred Baroman nga samtang nangatulog ang mga biktima, gisulod sa wa mailhing mga mamumuno ang ilang balay.

Sa imbestigasyon, matud pa ni Baroman nga si Nancy gyud ang tumong sa mga mamumuno sanglit katapad niini ang bana ug ang duha nila ka mga anak apan si Nancy ra gyud ang naigo. “Naangin lang siguro ni si Arnel kay nanlaban ni,” si Baroman miingon.

Personal grudge ang gitan-aw sa kapolisan sa motibo sa maong krimen. Giingong kanhi kini job order sa munisipyo ug gisusi usab sa kapolisan ang impormasyon nga duna kini pending nga kaso.

Samtang patay ang usa ka drayber sa traysikol nga si Horsesio Gabuya  Tapel, 35, nga gipusil sa riding- in-tandem diha sa Barangay Pajac, Dakbayan sa Lapu-Lapu alas 6  pasado ang takna sa miaging gabii. Si  Senior Police Officer 1 Luisito Ernie sa Homicide Section miingon nga nagmaneho og traysikol ang biktima gikan sa Mactan padulong sa ilang panimalay sa dihang gitaparan kini og usa ka motorsiklo nga may sakay nga duha  ka lalaki ug ang backrider mipusil sa ulo sa biktima. Dali nga mipabulhot sa motor ang mga kriminal samtang ang biktima gidala sa mga kabanay ngadto sa Lapu-Lapu City Hospital apan gideklarar kini nga patay na. Si Ernie miingon nga mohimo pa sila og dugang imbestigasyon sa maong pagpamusil. (BANAT NEWS)