Walo na-rescue, mabdos sikop tungod sa online cyberporn
CEBU, Philippines — Walo ka mga bata ang naluwas samtang usa ka 20-anyos nga mabdos ang gidakop sa PNP Women and Children Protection Center-Visayas Field Unit sa usa ka payag sa usa sa mga barangay sa Cordova.
Ang mabdos giingong migamit sa 3-anyos ug 12 anyos nga batang babaye sa online cyberporn bugti sa bayad sa langyaw nga nagtan-aw. Atol sa entrapment operation gitanyag niini ang duha ka bata nga mohimo og live sex show apan diay to mga operatiba na ang iyang kasabot hinungdan sa gihimong entrapment operation alas-10 kagahapon sa buntag.
Apil sa imbestigahon ang apohan sa usa sa mga biktima kay didto nahitabo ang krimen sa iyang payag.
Sigon pa sa hepe sa Women’s and Children’s Protection Center sa Central Visayas, Superintendent Romeo Perigo dili pa nila masuta ang eksaktong edad sa mga biktima, apan miingon siya naa ra ni sa tres anyos hangtod 12 anyos. Sigon niya usa ka tuig ang ilang gihimong surveillance sa suspetsado kay idlas ug on and off ang operasyon niini.
Matud ni Perigo moabot hangtod sa $100 ang makuha niini sa pag-chat lang og malaw-ay nga butang o mga litrato.
“Ang akong awhag dapat mo-stop na sila, kay sooner or later madakpan nato sila. Don’t let it get to a point where there is no return,” sigon pa ni Perigo.
Ang mga bata gidala sa mga social worker sa Department of Social Welfare and Development.
Matud pa ni Atty. John Tanagho, International Justice Mission Cebu Field office director ang maong babaye ikapito sa nasikop karong tuiga nga nalambigit sa online trafficking. (Rowena Capistrano/IBM)(BANATNEWS)
- Latest
