Piniriso sa City Jail maka-telepono na

CEBU, Philippines – Gibutangan og linya sa telepono ang Cebu City Jail alang sa mga piniriso nga makig-estorya sa ilang minahal sa kinabuhi.

Kini matud pa ni Konsehal Dave Tumulak, deputy mayor for police matters sa Dakbayan sa Sugbo, tungod kay gidili man ang cellphones sulod sa prisohan.

Gihulagway sa konsehal nga importante kaayo ang komunikasyon isip kabahin sa rehabilitasyon sa mga piniriso nga gitawag og “persons deprives liberty”.

Hinoon dunay guidelines nga ipatuman sama sa pag-limit sa tawag sa tres minutos ug i-schedule kini tungod sa kadaghan sa mga piniriso nga moabot na sa 5,000 kabuok.

Sa matag tawag sa mga piniriso dunay jail personnel nga magbantay ug maminaw aron maseguro nga malikayan ang paghimo og ilegal nga binuhatan.

Sigun sa konsehal nga unang higayon kini nga dunay linya sa telepono nga gibutang sa pasilidad nga alang gyud sa mga piniriso ilabi lagyo ang ilang kabanay ug dili makabisita.

Nidugang si Tumulak nga makatabang sab kini aron maminus-minusan ang mga dalaw sa pasilidad.

Duha pa ka linya sa telepono ang gibutang ug nanghinaut si Tumulak nga madugangan pa kini og laing upat ka linya. (/GMR)(BANAT NEWS)