Magpale: Davide wa natagbaw sa Pio

CEBU, Philippines — Posibleng wala natagbaw si Gobernador Hilario Davide III sa trabaho sa Provincial Information Office sumala pa ni Bise Gobernador Agnes Magpale.

Kini nunot sa plano sa gobernador nga mokuha og advertising agency nga mosangyaw sa mga programa ug proyekto sa iyang administrasyon.

Gigahinan kini og P3.2 milyones sa Kapitolyo ang pagkuha og ad agency apan ang plano nakadawat og pagsaway tungod kay anaa            may mga empleyado sa PIO.

Matud ni Magpale nga posibleng nakuwangan ang gobernador sa trabaho sa PIO sa pagpakatap sa impormasyon kalabot sa kalampusan sa Kapitolyo.

Si Oscar Pineda, ang focal person sa PIO sa Kapitolyo, niangkon nga aduna gyud silay kakuwangan.

"Ang kamatuoran nga ang PIO nag-lag-behind in terms of promotion, pagpakita sa accomplishment sa provincial government," matud ni Pineda.

Matud niya nga aduna sab silay limitasyon sa trabaho sa PIO.

"Dili mi basta-basta ka place og ads sa broadcast station," matud ni Pineda kinsa nisaysay nga dili mamahimo nga mabayran dayon sa Kapitolyo ang mga radio stations sa matag advertisement nga ipadungog sa kahanginan tungod kay makwestiyon sila sa Commission on Audit.

Sa patakaran sa mga broadcast stations, matud niya nga kinahanglan una sila mobayad ang magpa-advertise una pa kini mapadungog sa kahanginan.

Apan sa gobiyerno moagi pa og proseso una pa makapagawas og kwarta aron dili makwestiyon sa COA.

Si Pineda nagkanayon nga pinaagi sa ad agency mas mapadali ang pagpangita og ad placement sa mga estasyonan sa radyo. (/GMR)(BANATNEWS)