10 ka giingong sugarol sikop

CEBU, Philippines — Napulo ka giingong sugarol ang nasikop sa gipahigayong operasyon sa kapolisan batok sa ilegal nga sugal niadtong Domingo sa gabii diha sa mga dakbayan sa Lapu-Lapu ug Talisay.

Si SPO1 Jeffrey Managase sa Presinto 3 sa Lapu-Lapu City Police Office (LLCPO) miila sa mga suspetsado nga sila si Santos Celestino, 39, taga Sitio Sudtongan, Barangay Basak; Cifriano Sumalinog, 49, taga Barangay Looc; Joey Otamen, 30, taga Barangay Babag; Roland Talano, 38, taga Barangay Canjulao;  Melchor  Capa, 33,  taga  Barangay Pusok;  Elmer Taripe, 31, taga Barangay Pusok; ug Eleazar Hista, 43, taga Barangay Pajo.

Matud ni Managase nga nalingaw kaayo ang nagtapok nga mga sugarol og hantak sa maong dapit nga nakamugna og kasaba ug nakatugaw usab sa pagkahinanok sa mga lumolupyo sa Sitio Tugas, Barangay Gun-ob sa maong siyudad.

Nasakmit nga mga ebidensiya gikan sa maong dinakpan ang tulo ka sinsilyo nga gihimong panalang ug P800 nga ilang pusta.

Sa laing bahin, sa dakbayan sa Talisay ang labing ulahing nasikop mao sila si Ricky Cabiluna, 49; Rine Jore Languido, 42; ug si Jonadel Labura, 28.

Ang tulo giingong naabtan sa mga polis nga nagkalingaw  og duwa og tong-its ug wala’y daghang estorya gisikop ang tulo uban sa ebidensiya nga baraha ug ilang pusta nga P500  nga kwarta. (BANAT NEWS)