P1.9B supplemental budget sa Kapitolyo giaprobahan
CEBU, Philippines — Aprobado na sa Hunta Probinsiyal sa Sugbo ang P1.9 bilyones nga supplemental budget karong tuiga.
Ang P1.5 bilyones kuhaon gikan sa utangon sa Kapitolyo sa Development Bank of the Philippines (DBP).
Matud ni Danilo Rodas, ang provincial budget officer, nga ang maong supplemental budget mao ang inisyal nga appropriation sa pagtukod sa 20-storey building sa Kapitolyo.
"Ang appropriation is the authority to construct the building na funded by the loan," matud ni Rodas.
Gawas sa P1.5 bilyones, anaa sab sa unang supplemental budget ang P54 milyones nga pondo alang sa pagpatukod og multi-level parking building sa Capitol compound.
Ang maong parking itukod sa luna atubangan sa Provincial Disaster Risk Reduction and Management Office (PDRRMO).
Anaa usab sa supplemental budget ang sweldo sa mga bag-ong gihimo nga plantilla positions sa Provincial Tourism Office, Cebu Provincial Investment and Promotions Office (CPIPO) ug sa mga bag-ong hired nga doktor ug medical personnel sa 16 ka provincial ug district hospitals. (BANAT NEWS)
- Latest
