Kontrata sa Pamocor lugwayan
CEBU, Philippines — Mahimo na nga gamiton sa Cebu City Department of Public Services ang P21.1 milyones nga savings ubos sa miscellaneous service sa garbage collection aron lugwayan ang rental contract sa Pasajero Motors Corporation og duha ka buwan.
Kini human ang konseho niaprubar sa resolusyon ni Konsehal Eugenio Gabuya Jr., chairman sa committee on public services sa konseho, nga nagtugot sa City Budget Officer pagpangita og pundo sa maong kantidad.
Sigun ni Gabuya nga i-cover ang rental expenses gikan sa Hulyo hangtud Agosto sanglit ang kontrata sa Pamocor kutob ra sa Hunyo.
Sa P21.1 milyones, ang kagamhanan sa siyudad moabang og dili mominus sa 21 ka truck sa Pamocor nga dunay service fee matag oras nga P678 matag usa sulod sa 24-oras. Ang P21.1 milyones nga sa savings sa DPS gikan kini sa garbage collection sa Enero hangtud Abril 2018.
Sa nahabiling buwan niining tuiga posibleng mangayo og supplemental budget ang DPS alang sa rental. (BANAT NEWS)
- Latest
