Gihapsan og bakos sa uyoan

CEBU, Philippines – Arestado ang duha ka lalaki human gisuwayan pagpatay ang 27-anyos nga lalaki gamit ang bilya sa bakos niadtong Martes sa hapon sa Campangga, Barili.

Giila ang biktima nga si Eduardo Regidor samtang ang mga suspek mao sila si Rodrigo Regidor, 51, uyoan sa biktima, ug si Jason Languido, 26, taga  Sitio San Jose sa maong barangay. Nasayran sa kapolisan nga nag-inom ang biktima uban ang iyang mga amigo sa aseras diin nag-inom sab sa maong dapit ang mga suspek ug mga amigo atol sa piyesta sa barangay.

Kalit gihubo ni Rodrigo ang iyang bakos ug giduol ang biktima dayon gihapak ang bilya niini sa liog ug kamot sa biktima.

Niduol si Languido ug gisumbag ang biktima sa ubos sa walang bahin sa dughan. Niabot ang mga tanod ug gipapauli ang biktima apan gigukod kini sa mga suspek hinungdan nga napugos kini sa pagsukol ug nagsinumbagay.

Giingong aduna nay away sa una ang biktima ug ang uyoan niini nga wala mahusay. (/GMR)(BANAT NEWS)