NAMFed mosalmot sa party-list election sa 2019

CEBU, Philippines – Gikan sa pagduso sa pederalismo isip usa ka movement, ang National Alliance of Movements for Federalism (NAMFed, Inc.) ang nagtinguha nga makaangkon og lingkuranan sa Kongreso aron may modala sa ilang tingug ug padayong iduso ang pederalismo.

Naduso na niadtong Abril 30, 2018 sa Commission on Elections ang ilang application for registration sa Nagkakaisang Alyansa ng Masa sa Federalismo (NAMFed) isip usa ka sectoral party-list ug sa ilang partisipasyon sa 2019 Party-list Elections. Ang NAMFed gilangkuban sa NAMFed, Inc,; GENLIM, Inc. ug ABANTI BOHOLANO, Inc., nga pulos rehistrado sa Securities and Exchange Commission (SEC).

Matud ni NAMFed, Inc. executive vice president ug Tuburan, Cebu Mayor Democrito Diamante Jr. nga sila nangandam lang kung dili gyud maaprobahan ang pederalismo ubos sa termino ni Presidente Rodrigo Duterte hangtud sa 2022.

“If not realized, at least duna mi tingug sa Kongreso para ma-continue ang adbokasiya kay di man ni ma-sustain kung way mo-sustain,” sigun ni Diamante.

Si Diamante mao ang presidente sa League of Municipalities in the Philippines (LMP) Cebu Chapter, ug vice president sa LMP-Visayas.

Matud niya nga ang NAMFed, Inc. komitado sa pagpadayon sa adbokasiya human sa 2022 pinaagi sa aktibong pagsalmot sa Kongreso.

Masaligon si Diamante nga sila makaangkon og lingkuranan sa Kongreso pinaagi sa tabang sa mga mayor lukop nasud ug tanang chapters sa federal movements.

Nagpahigayon ang NAMFed, Inc. ug usa ka joint conference sa Cebu City kagahapon nga gipangulohan sa ilang national chairman, retired General Danilo Lim, ang chairman sa Metro Manila Development Authority.

Ang mga nisalmot mao ang mga lider sa Visayas Alliance of Federal Movements (VAFed), Cebu Movement for Federalism (CeMFed), Sugbuhanon Federalismo (SugbuFed), Inc., BarKaDa, JVE Kampil (Kakampi ng Mamayang Pilipino) ug Political Officers League of the Philippines (POL Phil). (/GMR)(BANAT NEWS)