Koreano, laing 2 sikop sa shabu
CEBU, Philippines – Mobalor sa kapin P200 mil ang nasakmit sa kapolisan nga shabu sa tulo ka suspek sa Sitio Santo Niño, Lahug, Siyudad sa Sugbo niadtong Biyernes sa kaadlawon.
Tungod sa mas gipalapdan ug gipahugtan nga operasyon batok sa ilegal nga drugas, nagpahigayon ang kapolisan og buy-bust operation ug entrapment sa Sitio Santo Niño.
Nadakpan ang tulo ka suspek nga giila nga sila si Clinton Go alyas Choco, 29; Josephine Quirante, 37, ug Kim Kyong Don, 45, nga usa ka Koreano apan kasamtangang nagpuyo sa maong lugar.
Nadakpan sa akto si Go ug Quirante atol sa operasyon niadtong Biyernes sa kaadlawon ug samtang gidakop ang duha ka suspek nakit-an sab sa lugar ang Koreano nga padulong na unta sa paggamit sa ilegal nga drugas hinungdan nga gidakop sad kini sa kapolisan. Nasakmit gikan sa mga suspek ang 11 ka pakete sa gituohang shabu nga adunay gibug-aton nga 17.1 gramos ug mobalor og P207,444 mil.
Ang mga nadakpan wala naapil sa watchlist sa mga mogamitay og ilegal nga drugas sa maong lugar. (Pegeen Maisie Sararaña/GMR)(BANAT NEWS)
- Latest
