Langyaw, inahan gisikop

CEBU, Philippines – Gibalhog karon sa sulod sa detention cell sa Presinto 4 sa Lapu-Lapu City Police Office (LLCPO) ang usa ka German national uban sa 24- anyos  nga lalaki tungod sa kaso sa human trafficking ug naluwas usab ang 12-anyos nga lalaki kauban  sa 16 -anyos nga kauban niini.

Ang operasyon sa kapolisan gihimo alas- 4 pasado ang takna sa hapon niadtong miaging adlaw sa Sitio Ka Insong, Barangay Basak, Dakbayan sa Lapu-Lapu.

Si Police Superintendent Mark Gifter Sucalit nga maoy hepe sa City Intelligence Branch (CIB) sa LLCPO miila sa mga suspek nga sila si Ulrich Market, 67, usa ka retired computer technician nga nagbakasyon ug nagpuyo sa usa ka apartelle sa maong dapit.

Nadakpan usab ang giingong bugaw nga si Ryan Dosdos Duarin, taga Sudlon, Barangay Lahug, Dakbayan sa Sugbo.

Sumala pa nga adunay nakasumbong sa barangay bahin sa langyaw nga adunay mga kaubang menor de edad ang langyaw hinungdan sa gilusad nga operasyon sa mga sakop sa Marigondon Police Station 4 ug Children’s Legal Bureau.

“I am absolutely not guilty. No, there was a minor in the room, I have seen that he is very young but I have done nothing with them. It’s a misinterpretation. Nothing sexual and something like that,” panghimakak pa ni Market.

Si Chief Inspector Juan Capacio sa Marigondon Police Station 4  miingon nga base sa ilang imbestigasyon, nagkahimamat silang Market ug Duarin sa male to male dating site.

Sumala pa nga gihatagan ni Market si Duarin og P2 mil aron mangita og mga menor de edad nga maoy naluwas sa operasyon.

“Pag-abot nila didto, tua sa sulod ang mga minor ug ang foreigner. Ang foreigner nitunol og kwarta didto sa legal aid nga kuyog sa mga minor. Nihatag siya’g P2,000 unya mao atong na-recover,” sumala pang Capacio.

Si Market pasakaan og kasong Qualified Trafficking under Republic Act (RA) 10364 o Expanded Anti-trafficking in Persons Act and RA 7610(Child Abuse).

Ang mga menor de edad gikustodiya na sa Women and Child Protection Desk sa Marigondon Police Station 4. Sa laing susamang kaso, usa ka inahan ang gidakop sa mga sakop sa Women and Children Protection Center- Visayas Field Unit  ( WCPC- VFU) ug kapolisan sa lungsod sa San Fernando tungod sa cyberpornography diha sa barangay Sangat.

Si WCPC-VFU Chief Romeo Perigo miingon nga sa ilang imbestigasyon ang inahan mismo ang nakig-transaksyon ug nitanyag sa mga hubo nga hulagway ug sex video sa anak bugti sa bayad.

Wala masayod ang suspek nga mga operatiba ang iyang ka-chat ug misugot kini sa transaksyon hinungdan sa gilusad nga entrapment operation batok kaniya.

Apan ang inahan miinsister nga inosente siya kay matud niya kabubut-on sa anak ang pagapil-apil sa cyberpornography ug gani nangimbitar pa kini og mga amiga.

Apan si John Tanagho, IJM Cebu Field Office Director miingon nga mao gyud kini pirmeng pangangkon sa mga madakpan.

Si Perigo miingon nga ka tulo ka higayon sulod sa  usa ka semana makig-transaksyon ang suspek ngadto sa mga online customers niini bugti sa bayad nga P2,500 hangtod 3,500.

Si Vice Governor Agnes Magpale mibutyag nga mas daghan silang nadawat nga report bahin aning cyberpornography karon itandi sa miaging tuig tungod kay daghan namang mga tawo ang mosumbong.

Anaa na sa DSWD ang anak sa suspek uban sa laing duha ka menor de edad nga nag-edad 7-anyos ug 9-anyos nga batang lalaki. (Flaire A. Bayalas ug Jezalyn Capute/IBM)(BANAT NEWS)