Wala pa’y gibutyag nga responsable pagbanhig ni Loot

CEBU, Philippines – Ang mga sakop sa Special Investigation Task Group Maya nga nag-imbestigar sa pagbanhig ug pagtinguha pagpatay ni Mayor Vicente Loot didto sa Barangay Maya, Daanbantayan kaniadtong Domingo, wala pa gyud masayod kinsa ang mga responsable sa maong pagpamanhig.

Kagahapon nagtigum ang mga sakop sa task group ug nagbayloay sila sa mga nahipos nila nga kasayuran kabahin sa kaso nga ilang giimbestigar. Matud ni Cebu Provincial Police Director Manuel Javier Abrugena nga anaa na sa 50 porsiyento ang ilang imbestigasyon.

Apan matud ni Senior Superintendent Abrugena nga bukas sila sa pakig-alayon sa National Bureau of Investigation (NBI) kon moabag kini sa paghimo og imbestigasyon.

Gitataw ni Abrugena nga dili panagsama og “pattern” ang nahitabo nga pagpangrakrak kang Mayor Loot ug sa negosyante nga si Wellington Lim nga gibanhigan usab didto sa Archbishop Reyes Avenue niadtong Marso.

"We are not comparing the two cases. We cannot compare one case to another," matud ni Abrugena human nga adunay mga migawas nga taho nga ang pagbanhig ni Loot, susama ra sa nahitabo ni Wellington Lim.

Si Wellington sakay sa Ford Expedition ug gikan pa sa iyang karaoke bar diha nga girakrakan sa mga armadong tawo ang iyang gisakyan, ug gipusil patay ang usa ka gwardiya, ug naangol ang kauban, apil ang duha ka langyaw.

Kaniadtong Sabado, si Loot uban sa iyang tibuok pamilya nga luwan sa bangka ug modunggo na unta sa pantalan sa Barangay Maya, diha nga girakrakan sila og mga bala sa lima ka armadong tawo nga nagpaabot na daan. Wala maunsa si Loot ug ang iyang pamilya, apan samdan ang iyang duha ka driver ug katabang.

Gikondenar sa Philippine Military Academy (PMA) Class of 1982 ang pagtinguha nga pagpatay sa pamilya sa ilang kauban nga si Loot, kinsa sakop sa PMA Sandigan Class of 1982.

Ang mga kauban ni Loot sa military academy nga mga retiradong heneral ug mga opisyal sa militar ug kapolisan nanawagan alang sa paspas nga imbestigasyon sa maong insidente.

Nanawagan sab ang grupo ngadto sa PNP ug NBI sa pagpahigayon og tinud-anay nga imbestigasyon hangtud nga makab-ot ang kasulbaran sa maong kaso aron maseguro ang kaluwasan sa tibuok pamilya. (Gregg M. Rubio/RUB)(BANAT NEWS)