Barangay treasurer gipadakop sa mayor

CEBU, Philippines – Gidakop ang barangay treasurer sa barangay Talisay, lungsod sa Sta. Fe human gipasanginlang nanghulga sa mga botante atol sa piniliay niadtong Lunes sa buntag.

Ang maong gidakop mao si Vicente Illustrisimo. Sumala pa ni Police Senior Inspector Armando Labora nga nakadawat sila og tawag gikan kang Sta. Fe Mayor Jose Esgana nga nag-report nga adunay komosyon sa maong lugar hinungdan nga girespondehan kini sa polis.

Apan pag-abot didto, gidakop na ni Esgana ang maong gipasanginlan. Nasuta nga nagkagubot didto human giingong nagtukod og tent si Illustrisimo uban sa iyang 15 ka mga kauban sa mismong agianan sa mga botante diin miagi ang grupo sa usa ka Willy Zorio.

Sumala pa sa imbestigador nga si PO2 Jhonard Loyao nga giingong gihulga ni Illustrisimo si Zorio nga ‘ayaw mo pagbotar ha.’ Apan matod pa ni Labora nga gihimakak kini sa kampo sa gipasanginlan. “Gi-deny gyud sa suspect ug matod pa nga nagbutang lang sila og tent didto para sa tapok-tapok sa birthday pero layo ra kaayo ang balay sa nag-birthday mga 500 meters away. Daplin og kalsada, ang mga botante makaagi gyud didto maka-create og provocation ug intimidation gyud,” si  Labor miingon. (Ermida Moradas/IBM)(BANAT NEWS)