Babaye gituok sa magsuong lalaki

CEBU, Philippines – Gituok ug gisukmag ang usa ka babaye sa duha ka managsuon nga silingan niini niadtong Lunes sa kaadlawon sa F. Jaca Street, Tugas, Pardo, Cebu City.

Ang duha ka suspek giila nga sila si Rodil Hijara Dinampo, 45, ug Edward Hijara Dinampo, 40, kinsa giingong nakainom niadtong higayuna.

Ang hinungdan sa panghitabo mao ang pagpangutana sa babaye kung kinsa ang nagbalhin sa motor sa iyang bana ug wala gibalik sa pwesto.

Apan wala siya nagdahum nga moabot sa dakung gubot ang ilang panag-estorya tungod sa kainit sa ulo ni Rodil nga nitubag kaniya tungod kay nakainom.

Nibalik sa ilang panimalay si Rodil kuyog ang iyang igsuon nga si Edward kinsa nakainom sab ug nanghagis. Apil sa ilang pagpanghagis ang pagtumba sa motor sa bana sa babaye.

Nipatunga ra unta ang babaye sa away sa iyang bana nilang Rodil ug Edward apan siya gituok ug gisukmag hinungdan nga mas nidaku ang gubot ug didto nanawag na sa kapolisan ang ilang ubang silingan.

Gibalhug si Rodil ug Edward sa selda sa kapolisan sa Pardo. (CNU Intern/GMR)(BANAT NEWS)