PUJ nanghakot botante gipangdakop
![PUJ nanghakot botante gipangdakop](https://media.philstar.com/images/articles/puj-1_2018-05-14_21-00-35.jpg)
CEBU, Philippines — Gidakop ang tulo ka jeep de pasaheroan sa mga tinugyanan sa Land Transportation Franchising and Regulatory Board kagahapon sa buntag gumikan sa pagbiyahe sa dili ilang linya sa paghakot og mga botante.
Matud ni LTFRB-7 Director Ahmed Cuizon nga unang nadakpan gahapon sa buntag sa may Cebu Normal University ang sakyanan nga biyahe og Oppra-Colon, ikaduha ang Urgello-Colon nga nadakpan sa may City Central School ug ikatulo sa may Abellana National School nga may rota nga Urgello-Colon.
Nadakpan ang maong sakyanan kay wala kini gipakita nga special permit nga unta naa man silay nahatagan og special permit sa kantidad nga P170 matag usa.
Dugang pa ni Cuizon nga aduna silay mga naisyuhan og special permit nga tulo ka sakyanan nga gigamit sab sa City Central School.
Sumala pa ni Cuizon nga ipatawag nila ang mga driver ug operator sa ilang buhatan alang sa usa ka hearing nga ipahigayon aron mahibaw-an kung unsay silot nga ilang ipahamtang.
Gipahibawo ni Cuizon nga kung kinsay nibayad sa mga jeep ila kining himoan og report ug iduso sa buhatan sa Commission on Elections alang sa tukmang lakang nga himoon. (BANAT NEWS)
- Latest