Mga armado, nagmaskara nasigpatan

CEBU, Philippines – Gipasusi ni Cebu City Police Office Director, Senior Supt Joel Doria, ang taho nga adunay gatusan ka nagmaskara ug armadong mga tawo nga nakit-an sa kabukiran sa Dakbayan sa Sugbo.

Apan sumala pa ni Doria nga base sa ilang monitoring negatibo ang maong taho.

Ang maong taho nadawat sa kapolisan human usa ka kapitan sa bukirang bahin sa dakbayan ang nakakita sa presensya sa mga tawo nga kadudahan og lihok ug may mga nagmaskara sab.

Nagtuo si Cebu City Mayor Tomas Osmeña nga mga tawo ni Konsehal Pastor Alcover Jr. ang mga nasigpatan sa Barangay Agsungot.

Wala na hinoon nidetalye ang mayor kun nganong si Alcover ang iyang gituohan apan niawhag kini sa kapolisan nga mopakatap og mga polis sa mga bukirang barangay sa siyudad.

Sa iyang bahin, si Alcover nihimakak sa pasangil sa mayor ug giingong black propaganda kini sa kontra sa iyang asawa sa umaabot nga piniliay kinsa magpapili sa pagka-kapitan sa Barangay Agsungot.

Nidugang ang konsehal nga duna siya’y rider’s club nga magtuyok-tuyok sa Agsungot nga motabang pag-monitor sa security sa lugar.

Nunot niini, iyang gihagit si Osmeña nga arestuhon ang mga giingong nagmaskara nga mga tawo aron mahuman ang maong isyu.

Samtang si Konsehal Dave Tumulak, chairman sa committee on public order and safety sa konseho sa siyudad, niingon nga sugod sa niaging adlaw duna na sila’y mga polis nga gipadala sa kabukiran. (Decemay P. Padilla/GMR)(BANAT NEWS)