Malacañang mohatag reward

CEBU, Philippines – Gikompirmar ni Presidential Communications Operations Office (PCCO) Secretary Martin Andanar nga mohatag sila og kwarta nga kantidad og P200,000 isip ganti sa makahatag og impormasyon sa pagpatay sa magsisibya sa Negros Oriental nga si Edmund Sestoso.

Ang kapolisan ug ang National Bureau of Investigation nipagawas na og cartographic sketch sa giingong gunman.

Ang Malacañang adunay Presidential Task Force on Media Security nga gipanguhohan ni PCCO Undersecretary Joel Egco sa pag-monitor sa imbestigasyon sa pagpatay kang Sestoso.

Ang Special Investigation Task Group Sestoso namugna niadtong Martes ug gimanduan ang kapolisan sa Dakbayan sa Dumaguete sa pagahimoong imbestigasyon.

Si Egco niadto sa haya ni Sestoso kauban ni Andanar ug Special Assistant to the President Christopher “Bong” Go nga nihatag sa ilang simpatiya sa pamilya ni Sestoso.

Sila sab nakighinabi sa mga kauban ni Sestoso sa media sa Dumaguete City mahitungod sa insidente.

Matud ni Presidential Spokesperson Harry Roque nga wala sab nagustuhi sa presidente ang nahitabong pagpatay kang Sestoso.

Gibutyag ni Labor Undersecretary Jacinto “Jing” Paras kinsa kanhi kongresista sa Negros Oriental nga adunay koneksyon sa trabaho ang nahitabong insidente.

“Sestoso has been very strong pagka-moadvocate og belief, support of a person, ideology or policy, very intense ni siya... Panawagan nato sa atong pangulo bilang taga Negros Oriental and I’ve known Edmund Sestoso personally as an upright media man, this is an affront to press freedom natural nga kinahanglan gyud the investigation should go to the bottom,” matud ni Paras.

Gituki na sa kapolisan sa Negros Oriental ang motibo sa pagpatay lakip na ang iyang trabaho, pamilya ug kalambigitan sa politika ug ang giingong konektado kini sa mga progressive groups. (Caren Abing, CNU Interns/GMR)(BANAT NEWS)