Full alert na ang ubos sa ewas

CEBU, Philippines – Isaka sa full alert status ang mga estasyon sa kapolisan nga lakip sa girekomendar nga Election Watchlist Areas (EWAS) ngadto sa Joint Peace and Security Coordinating Council atol na sa pagsugod sa kampanya karong adlawa.

Kini maoy gibutyag ni Cebu Provincial Police Office Director, Senior Supt. Edgar Alan Okubo.

Kinahanglang 80 porsiyento sa kapolisan ang mo-duty aron magpahigayon og hugot nga checkpoint ug magpatrolya sa mga hingtungdang lugar.

Karong Sabado i-finalize sa CPPO ang listahan sa EWAs aron irekomendar ngadto sa JPSCC karong Mayo 8.

Ang Lungsod sa Tuburan maoy unang girekomendar sa CPPO ngadto sa JPSCC nga ilakip sa EWAs sanglit aduna sila’y nasubay nga election related violence samtang gitun-an pa nila ang mga Lungsod sa Medellin, Daanbantayan, Dakbayan sa Bogo ug Tabogon.

Samtang si Cebu City Police Office (CCPO) Director, Senior Superintendent Joel Doria, niingon nga bisan wala’y barangay sa Dakbayan sa Sugbo nga ipaubos og EWAs, hingusgan gihapon nila ang monitoring sa mga kandidato ingon man sa mga supporters niini.

Ang 70 ka magpapili alang sa Barangay ug SK Elections ang nanumpa ug namirma og peace covenant alang sa hapsay nga piniliay karong Mayo 14.

Atol sa programa, ang kapitan sa Adlaon nga si Nieves Narra nanghinaut nga dili unta magpahiranay og lapok ang mga kandidato.

“Ang ako lang ihangyo, nga  dili lang ta magdinautay, kay sukad pa kaniadto, ang amo kaatbang wala gyuy dinautay,” si Narra niingon.

Nipuli si Narra isip kapitan sa barangay niadtong Hunyo 2016 human mamatay sa sakit ang iyang anak nga si Elvis Narra, 39-anyos.

Si Senior Inspector Arieza Otida, deputy chief sa CCPO Police Community Relations Office, niingon nga andam ang kapolisan nga motutok kon kinsa kadtong moguba sa maong panaad.

Samtang giawhag ni Konsehal Dave Tumulak, deputy mayor for police matters sa konseho sa siyudad, ang religious sector sa pag-apil sa peace covenant sa nagkalain-laing barangay.

Niadtong Abril 24 nagpadala si Tumulak og suwat hangyo sa Archdiocese of Cebu sa paghangyo sa simbahan sa pag-monitor sa ilang dapit.

Isip chairman sa committee on public order and safety, panghinaut ni Tumulak nga wala’y kasamok atol sa eleksiyon.

Lakip sa nagpirmahay og peace covenant ang mga kandidato sa Sawang Calero, Suba, Pasil, Pahina San Nicolas, San Nicolas Proper, ug Barangay Calamba.

Si Apolonio “Liglig” Maranga Jr, nidagan sa pagka-kapitan sa Barangay Suba atbang ni Jojo Sable, nibutyag nga niapil siya sa covenant signing tungod kay malaumon siya nga magmalinawon ug limpyo ang umaabot nga piniliay.

Samtang si Elconjim Concha, kinsa sulod sa ikaduhang higayon magpapili, nitug-an nga niapil siya sa peace covenant signing tungod kay gusto siya og malinawon ug matinud-anon nga eleksyon.

Sa Barangay Ermita gihimo sab ang covenant signing atubangan sa kapolisan sa Carbon Police Station. (Clydyl Avila, Decemay P. Padilla ug Rowena D. Capistrano/GMR)(BANAT NEWS)