Napaslak ang tiil sa makina naputol
CEBU, Philippines – Maayong pagkaputol sa tiil sa usa ka trabahante sa tig-supply og tubig sa Metropolitan Cebu Water District human napaslak sa makina samtang siya nalimpyo sa water treatment facility sa ilang planta sa Barangay Cantumog, Carmen niadtong Lunes sa hapon.
Si Renato Peroso, 46, plant operator, sa Cebu Manila Water Development, Inc. (CMWD), ang dali nga gidala sa provincial hospital sa Dakbayan sa Danao apan gibalhin sa usa ka pribadong tambalanan sa Dakbayan sa Sugbo diin nasayri sa Banat News ang insidente niadto lang Miyerkules.
Asoy pa ni Peroso nga alas 4 sa hapon samtang naglimpyo siya nga nagtiniil kalit lang siyang nadakin-as sa kadangog sa lapok ug didto sa recycling pump machine napaslak ang iyang tuong tiil.
Dali nga gipawong sa iyang kauban ang makina apan ulahi na kay naputol na kutob sa tikod ang iyang tiil. “Disgrasya gyud to sir,” matud pa ni Peroso.
Samtang gitabangan si Peroso sa kompaniya, matud niya nga giingnan siya nga dili una maghunahuna nga mawagtangan siya og trabaho kung makalakaw na siya og balik.
Unang nagtrabaho si Peroso isip pipefitter ubos sa kontraktor nga nag-ugmad sa bulk water supply project niadtong 2012.
Gikuha siya sa CMWD, usa ka joint venture sa Manila Water Consortium, Inc. ug kagamhanan sa Probinsiya sa Sugbo, dihang nag-operate na ang proyekto nga nag-supply og tubig ngadto sa MCWD niadtong 2015 isip plant operator.
Si Peroso nagpuyo sa bunkhouse nga kanhi opisina sa project contractor duol sa planta.
Ang CMWD nag-supply og 35 million liters matag adlaw nga tubig sa MCWD hangtud sa 2035 gikan sa Luyang River sa Lungsod sa Carmen. (/IBM)(BANAT NEWS)
- Latest
