Trabahante sa softdrink company nakadaog og Pag-ibig house and lot
CEBU, Philippines – Usa ka equipment operator nga nagtrabaho sa usa ka beverage company ang nakadaog og house and lot atol sa pagsaulog sa ika-116 nga selebrasyon sa adlaw sa mamumuo sa IEC Convention Center (IC3) kagahapon.
Si Restituto Contreras, 55 anyos, sulod na sa 30 ka tuig nga nagtrabaho sa maong kompanya mao ang nabunotan gikan sa libohan nga niapil sa raffle draw nga gipahigayon kagahapon kon diin gitambongan kini sa nagkadaiyang mamumuo, job applicants ug mga opisyal sa nagkadaiyang ahensya sa gobiyerno.
“Dako akong kalipay dili nako masabtan ang akong kaugalingon nga nakadaog diay ko sa tumang kasayon sa ingon ani nga raffle nga gihatag sa Pag-IBIG,” matud ni Contreras.
Si Presidente Rodrigo Duterte maoy mismo mihatag sa ceremonial key ngadto kang Contreras kagahapon.
Si Contreras kinsa taga barangay Tejero, Cebu City nagkanayon siya mismo ang mopili sa lugar kon asa sila mopuyo ubos sa housing project sa Pag-Ibig.
Matud niya nga ang yuta sa gitukoran nila sa ilang balay sa Tejero, gidatahan ra niya samtang ang pagtukod sa balay giagi usab sa housing loan sa Pag-Ibig.
Sumala pa niya ang balay nga iyang gidag-an adunay mga 50 metro kwadrado nga area nga gibanabana anaa sa P1.2 milyones ang kantidad. (Rowena Capistrano/IBM)(BANAT NEWS)
- Latest
