Osmeña nasurpresa sa narco-list
CEBU, Philippines — Nasurpresa si Cebu City Mayor Tomas Osmeña kon nganong wala’y barangay officials gikan sa Cebu City ang nalakip sa gipagawas nga listahan sa Philippine Drug Enforcement Agency kabahin sa mga opisyales sa barangay nga nalambigit sa ilegal nga drugas.
Si Osmeña miingon nga adunay barangay officials dinhi sa Sugbo nga nalambigit sa ilegal nga drugas.
“Officials, captain and councilors in that one barangay are involved,” matud ni Osmeña nga wala direktang mohingalan sa nahisgotang barangay apan naa kini nahimutang sa south district.
Sumala pa sa mayor aduna usab siya’y mga gidudahan nga mga barangay officials sa north district apan wa kini niya hinganli o kon asa nga barangay.
Kahinumduman nga ang kapolisan mibutyag nga adunay dili mo menus 20 ka mga kandidato sa Sugbo ang miduso sa ilang certificate of candidacies nga nalakip sa ilang watchlist.
“I cannot comment on that but I know there are... it just shows that they’re not in control,” si Osmeña nagkanayon bahin sa listahan sa PDEA.
Base sa report sa GMA News.tv ang tigpamaba sa PDEA Derrick Carreon mikompirmar nga adunay 211 ka mga barangay officials sa tibuok nasud ang nalakip sa maong listahan diin 89 niini ang barangay kapitan ug 122 ang barangay kagawads.
Matud pa dili momenus 20 niini ang gikan sa rehiyon siete. -/IBM (BANAT NEWS)
- Latest
