Nisukol napusilan patay

CEBU, Philippines — Patay na nga nadangat sa  tambalanan ang usa ka gidudahang tigpayuhot  og ginadiling drugas human kini giingong nakigpinusilay  sa kapulisan.

Ang  insidente  nahitabo  sa barangay Obong,  lungsod  sa  Dalaguete  pasado  ala-una kagahapon nga niresulta sa kamatayon ni Joepit Cabilon  Cabriana.

Ang suspek gikatahong nadakpan na kaniadto tungod gihapon sa kaso sa ginadiling drugas apan nakagawas human nakapiyansa.

Matud pa nga dihang gipahigayon ang operasyon nakamatikod si Cabriana nga  pulis ang iyang katransaksyon ug misuway sa pag-ikyas.

Apan nagunitan kini sa pulis nga maoy nagpakaaron- ingnong poseur buyer.

Sumala pa nga mibunot si Cabriana og armas hinungdan  nga  giunhan kini pagpusil sa mga polis hinungdan sa sinukliay og bala. Ang suspek daling gidala sa Julio Cardinal Rosales Hospital apan nakabsan gyud kini sa kinabuhi.

Nakuha  sa  posisyon  sa dinakpan  ang usa ka  paltik nga .38  kalibre nga rebolber nga  dunay  tulo ka bala, duha  ka basiyo sa bala,  buy-bust  money  nga  P500 ug  usa  ka  pakete  nga  gituohang  shabu. - /IBM (BANAT NEWS)