Nagbansay didto sa China

CEBU, Philippines — Mahuman na karong umaabot Mayo 2 ang duha ka semana nga training-seminar sa Public Policy Management nga gipahigayon didto sa Hainan Province sa nasud nga China diin usa ka sakop sa Cebu Provincial Disaster Risk Reduction Management Office (PDRRMO) nga si Rhee Telen II maoy  representante sa Sugbo uban sa laing 19 ka mga Pilipino nga nagrepresentar sa Pilipinas.

Madasigon si Telen nga nahimong representante sa Cebu ug kini miingon nga naghinam-hinam siya sa pagkat-on sa kamahinungdanon sa good public policy management sa economics, finance, investment, turismo, ug edukasyon sa natad sa DRRM ug proteksyon sa kinaiyahan.

Sa duha ka semana nga training-seminar, ang mga professor ug scholar gikan sa Department of Commerce sa Hainan Province, Hainan University, ug Hainan College of Economic and Business,  ang mihatag og mga lecture, samtang ang mga trainee moagi og classroom teaching ug fieldwork.

Gipaluyohan ang maong seminar sa Ministry of Commerce sa People’s Republic of China ug giorganisa sa Commercial Training Center sa Department of Commerce sa Hainan Province.

Ang maong kalihokan nagtumong sa pagpalambo sa panaghigala tali sa China ug sa nagkalain-laing mga nasud, ingon man aron mapalambo ang kooperasyon kabahin sa economy ug trade, human resources ug economic society. - Myca Mae Gabato, CNU Intern (BANAT NEWS)