Bag-ong kapitan wala pa kalingkod

CEBU, Philippines — Hingpit na nga nakapanumpa ang midaug nga barangay kapitan sa Punta Engaño, Lapu-Lapu City nga si Diosaminda “Josie” Hayashi human gideklarar sa korte nga maoy midaug sa 2013 elections batok kang Lourdez Ibag.

Si Hayashi nanumpa sa iyang katungdanan kang  Presidential  Legislative Liaison Office Head, Secretary Adelino Sitoy human sa paghatag og pagtugot sa Comelec Regional Office sa pag-asumir  na niini sa iyang katungdanan isip barangay kapitan sa Punta Engaño.

Gipasaligan si Hayashi ni Atty. Veronico Petalcorin, Comelec Regional Director nga aduna na kini igong katungod sa pagtuman sa iyang katungdanan isip maoy midaug nga barangay kapitan. Si Judge Alwen Pacqueo sa Branch 1 sa MTCC sa Dakbayan sa Lapu-Lapu ang miluwat og Writ of Execution niadtong miaging Huwebes kang Hayashi sa pag-asumir na sa iyang katungdanan sanglit nakaangkon man kini og kadaugan sa iyang protesta batok kang Lourdes Ibag ug nunot niini gimando usab sa korte ang pag-reconvene sa   Barangay Board of  Canvassers.

Si Department of Interior Local Government  Director Rene Budeos miluwat na usab og kamanduan sa DILG Officer sa Dakbayan sa Lapu-Lapu sa pag-ayuda kang Hayashi sa iyang pag-asumir sa iyang katungdanan.

Si Hayashi nga molingkod na isip bag-o nga barangay kapitan sa Punta Engaño, mibisita na sa barangay hall niadtong miaging adlaw ug mainiton usab kining gihangop sa iyang mga tigpaluyo nga misugat kaniya.

Iyang gipahibalo nga karong adlawa magsugod na siya sa iyang trabaho isip barangay kapitan sa Punta Engaño. (BANAT NEWS)